Lu Paisi Mia

Sobbra lu paisi mia tutti teninu ti tiri
ca è piccinnu e non c'eti nienti ti vitiri
Ca li femmini sù pitteculi...ah che presciu
ma li masculi pesciu ti pesciu...
Ca gira e ota tutti ndi canuscimu
ca nò ssi può fari nienti
ca tutti a momenti lu sapimu.
Ca ci nu cristianu nci minti ti cchiui a guariri
ntra lu paisi gia l'annu fattu muriri
E' veru ca non ci funziona nienti
non c'eti na strata sana...senza nu caconi
basta ca nd'annu chini di pali e ti lampioni
Ca dda scola ti via Stazzioni la sta fannu catiri
e li ricordi nuesci sta fannu spariri
Nu stuezzu ti chiazza na fiata nci stia
mò annu chiantatu n'arvulu ti aulia.
E' veru ndi mancanu tanti cosi
ma li uerti stannu chini ti menta e ti rosi
poi nci stannu tanti bueni cristiani
ca ti mocca si lleanu lu pani
cunci lu tannu a nci bisogna
senza cu nci fannu sintiri vergogna
..e poi non è veru ca tutti ulimu ndi li sciamu
ma poi lu cori nuesci qquai lassamu
perceni ulimu li vecchi amici cu vitimu
e sobbra la terra noscia cu caminamu
ma soprattuttu lu bellu dialettu nuesciu cu parlamu.
E allora Matonna ti lu Rusariu prea e mintici na manu
sobbra tutti li cristiani ti Tuturanu.